Nadalets a Marcilhac lo 12 de decembre


Quand l’IEO12 se lancèt dins l’aventura de tornar cantar e de tornar far cantar de « Nadalets, fa ara qualquas annadas, se pensava pas que lo resson seriá tan bèl...
Cal dire que  ven de luènh lo Nadalet, Nadalet, pichon Nadal que prepara la fèsta granda de la patz, de l‘enfància ! Ven de força luènh, amb sas campanas e sos cants e nos parla dins aquela lenga nòstra que vòl pas morir…
« Qu'es aquela clartat qu'esclaira la campanha ? »… D'unes « nadalets » tindan totjorn dins las nòstras aurelhas :  « Enfants, revelhatz-vos », « Pastres, pastretas », « Lèva-te vite, Bertomieu », « Chut ! chut ! Chut ! », « Cantem Nadal », « Nadal dels aucèls », « Nadal tindaire ». O encora « lo Nadalet de Ric-Estar » …escrich en 1864 per un Requistanés e que se canta  encara…
Nadal d’autres còps : ont l’occitan dintrava dins las glèisas amb los « nadalets », cap d’òbras populars dins la lenga del cada jorn…
Nadal de totjorn : fèsta de la lutz e de la vida que ja comença a grelhar, fèsta de la simplicitat, dels enfants e de la familha…
Nadal per deman : messatge de patz e de fraternitat, de solidaritat e de convivéncia.
***
Ongan, l’IEO12 es urós de vos convidar a un concèrt de Nadalets lo dimenge 12 de decembre a 15:00 dins la glèisa de Marcilhac.
Amb las coralas :   Arcolan  (Vilafranca)
                              Trad en 4d  (Sebasac)
                               L.K.P. (Vilafranca)
Concèrt dubèrt a totes. Participacion liura.