Dictada 2011 : Roges nivolasses - Cristian Chaumont

La Dictada occitana, no 13, lo 29 de genièr de 2011

Cristian CHAUMONT, Roges nivolasses (IEO Edicions, “Crimis” n° 191), pp. 21-22

La bòria, bastida sus un puèg al mièg de las pradas, èra pas luènh, coma pro
d’autras bòrias del país, d’una cassanhòla, que la copa annala e viranta ne balhava la
lenha per se calfar. (35 mots)
(Aicí s'arrèstan los pichons.)
Degun vegèt pas la siloeta amagada a la rasa del bòsc darrèr un arbre, agachant
l’espectacle de l’encendi e se tustant las cuèissas d’un aire content. Los pompièrs ara
rotlavan los tudèls. (67 mots)
(Aicí s'arrèstan los collegians.)
Albèrt Tòrt e dos gendarmas espepidavan los escombres a la cèrca d’indicis.
Sobte, darrèr un montairòl de daquòsses cremats, aturèron.
«Avètz vist, Capmèstre ? Una bombona de gas!»
Lo capitani dels pompièrs la butèt de la punta de l’artelh gròs. Rotlèt obesissenta e
voida. (111 mots)
(Aicí s'arrèstan los liceans.)
«Medamne ! diguèt al brigadièr dels gendarmas, lo robinet es dubèrt.
– Vaquí un encendi que me pareis un fuòc criminal, respondèt l’autre degaunhant
los gendarmas del temps vièlh.
– Mas es pas possible, pas possible ! repetiguèt lo Fonhenc, sortissent de son
esterlucada, mas qual filh de puta me pòt mal voler atal?
– Aquò, l’enquista o establirà ! Çaquelà, ja quicòm me sembla pas brica clar :
perqué laissar d’indicis atal... L’autre còp lo jerrican, aqueste còp una
bombona!» (193 mots)
-------------------------
Per desapartir los que serián a egalitat:

Quand març maieja, mai marceja.
L'adrech es solelhadís, l'avèrs ombratjós.
Ieu càmbii tostemps, d'aquí endavant vòli que càmbies.
Li agrada fòrça d'analisar e d'organizar.