Lo Bestiari musical, lo 17 de novembre

Qual coneis pas Joan Enric Fabre, entomologista, espepissaire de natura e dels insèctes, autor de "Souvenirs entomologistes", obratge revirat dins un quinzenat de lengas almens?
En Avairon, J.E. Fabre es l'òme de Sant Luòns de Leveson, lo vilatjon ont nasquèt lo 22 de decembre de 1823. Aqui uèi, se pot vistalhar son ostal devengut musèu. Aqui se pot veire las exposicions d'insèctes vius o mòrts de "Micropolis" , un autre musèu interactiu e modèrn.
E mai se la vida prenguèt J.E. Fabre cap a Avinhon e a "l'Harmas" (ermàs) de Serinhan, Sant Luòns e Roèrgue tot an pas doblidat l'òme celèbre del pais. D'aquel òme Jean Rostand disiá : "Un grand savant qui pense en philosophe, voit en atiste, sent et s'exprime en poète."
Pr'aquò, i a tota una fàcia de J.E. Fabre qu'es pas coneguda, o pas gaire o pas ges. Lo que deviá devenir majoral e "felibre di tavan" encontrèt Romanilha, Mistral, escriguèt de poèmas en provençal. Sus son armonium de l'Hermas, compausèt tanben de musicas.
Per far conéisser aquel aspècte de la personalitat de J.E. Fabre, l'IEO12 - Institut dels estudis occitans d'Avairon- a creat un espectacle bilingue : "Lo bestiari musical/Lebestiaire enchanté" amb musicas, poèmas cantats, poèmas legits... Adaptacion musicala de Michel Lacombe (acordeon), e Gerard Trulhé (guitara), mèsa en scèna de Joan Lois Cortial, poèmas diches per de benevòls de l'IEO12.
La "primièra" es estada donada lo 18 de novembre de 2012, a Sant Luòns coma se deviá , davant un cinquantenat de personas, amb la participacion de la comuna e de l'associacion dels "Amics de J.E. Fabre". I a agut d'autras representacions, a Rodés (17 de febrièr de 2013), a Espaliu (13 d'abrial).
L'IEO12 e l'associacion Trad en 4d vos convidan a la representacion que serà donada lo dimenge 17 de novembre a quatre oras de l'aprèp-dinnar a la sala" la Dolina", a Sebasac. 
Aprèp l'espectacle, serètz convidats a beure un veirat e se volètz, a dansar un pauc..
Entresenhas : IEO, Ostal del Patrimòni, Plaça Foch, Rodés
                                  ieo12@ieo-oc.org/ 06 83 53 07 92
Dates: 
Dimanche, 17 Novembre 2013 - 4:00pm
Imatge: